Америте, со закрпен состав се воигруваат за СП во Турција. Иако ова “закрпен“ е преблаго за состојбата во која се наоѓа оваа селекција на САД која ја одбија сите поголеми НБА ѕвезди па така најдобар нивни играч е и најмладата НБА ѕвезда Кевин Дурент.

Но, иако ги имаат најгоемите, не се само Америте со проблеми, така Пау Гасол го нема кај Шпанците, Диркулес кај Зи Џерманс, ги Ману и Тончи Паркер, Мемо Окур, а можеби и Хидо и така-натака…Отсуства кои во целост го одземаат шармот на ова СП и од кои веројатно најразочарани се самите Турци кои своите кампањи ги базираа на Коби, Пау, Паркер, Ману и Дирк, но и се надеваа на Леброн, Вејд, Амари, Двајт, Пол, Дерон итн…

Сепак, секое лошо со себе носи нешто добро, па така некои селекции кои не се надеваа на висок пласман сега имаат легитимна основа за тоа, но што е уште поубаво, во отсуство на сите овие ѕвезди шанса да засјаат ќе добијат некои интересни млади имиња. Едно од нив кај Америте е Руди Геј (во чии летачки способности никој не се сомнева), ако успее да влезе во одбраните 12, како и Андре Игудала, Дерик Роуз, Стивен Кари, Расел Вестбрук…

“Not really. He’s a free agent, he can do what he wants to do. He’s got to make his own decisions” - Лери Бирд за одлуката на Леброн.

До сега го слушнавме мислењето на Мајкл и на Меџик за одлуката на Лебронтије да го откачи Кливленд и да тргне на пат за Мајами во потрага по прстенот во друштво со уште две ѕвезди покрај себе. Додека Меџик и Мајкл дадоа изјави од типот дека никогаш во своите кариери, посебно кога тие биле во својот зенит, не би се удружиле еден со друг за да стигнат до врвот (истото го кажа и Баркли), Лери не го дели тоа мислење.

Со тоа Бирд уште еднаш, како и со својот стил на игра и сама кариера, се одвојува од своите најголеми ривали. А можеби човекот едноставно си има попаметна работа од тоа да се занимава со Леброн. Како на пример, составување на компетентен тим во Индијанаполис, нешто што веќе подолго време и фали на НБА.

ПС: и покрај изјавава, сигурен сум дека и Лери, како и Мајкл и Меџик, многу повеќе уживал во филингот на победување на своите најголеми ривали, отколку кога играл заедно со нив по Ол-Стари и на ОИ во Барселона.

И јас би рикал од среќа да сум на местото на Бош

Гледајќи ја сликава се уште ми делува како фотошоп. Но, тоа е реалноста за Мајами и за НБА од вчера. Новото Големо трио ја имаше својата презентација и вети големи нешта на Флорида. Она што е важно во целава ситуација е тоа што сите тројца ги ставија потписите на новите договори, а по се изгледа Пет Рајлу успеал да договори потпис-трејд на Леброн и Бош со нивните сега веќе екс-тимови.

Тоа, ако се спроведе во дело, на стариот лисец му дава доволно простор за маневар во кој би задржал веројатно двајца или најмалку еден од триото Квентин Ричардсон, Дорел Рајт и Јудонис Хаслем. Плус, доволно пари за ангажман на Мајк Милер. Овој податок значи многу за сите во Мајами, пред се поради тоа што постои можност да не бидат само Big Three + Чалмерс.

3:16 – The Numbers of Hope!

На стартот на отварањето на НБА пазарот на 1 јули, покрај големиот интерес за тоа кој ќе биде неговииот нов (стар) клуб, постојаната опсада од страна на медиумите и закажаните средби со претставниците на Нетси, Никси, Булси, Мајами, Клиперси и Кавси, Леброн доби и мистериозен подарок.

Пред една недела веста беше дека на вратата пред домот на Леброн се појавил мистериозен пакет за кој се до пред ден-два не се знаеше што содржел. Како и кога станува збор за терористички напад (не дека има некаква врска со ова) некој мораше да ја превземе одговорноста, а тоа во оваа ситуација го направија Булси.

Поточно, маркетинг агенцијата од Чикаго (Leo Burnett Worldwide ad agency), која веројатно е во соработка со челниците на Булси. Еве ја целата приказна објавена во Chicago Tribune.

Air Jordan’s 1 фино спакувани со прикладен текст на внатрешноста од горниот дел? Екстра!

Нема што, храбар, мангупски и пред се директен потег на Булси. Поискрена и пореална понуда од ова, амин.

Малце подзаборавиввме на “Фотка на неделата“, но еве ја совршената фотка и совршениот лик за нејзин камбек. Сите играчи на Лејкерси на шампионската парада која се одржа низ улиците на Лос Анџелес носеа некаква шампионска маичка и/или капче со логото на својот тим.

Сите освен, нормално, Рон Артест. Дибекот, како и во се останато, и на парадата мораше да биде посебен па така си носеше маичка на која си се рекламира самиот себеси, т.е. својата издавачка куќа.

Но, маичката не е ништо, посебно ако се погледне шапката која ја носеше. И после Тим Бартон го вика Џони Деп за улогата на Лудиот Шапкар во “Алиса во земјата на чудата“. На Дибекот за таа улога доволна му е само шапката, првиот дел од улогата веќе одамна го има покриено и редовно ни го докажува.

Се прашувам дали во вакво издание го виделе неговиот доктор и неговиот психијатар, на кои така срдечно им се заблагодари по победата во Game 7?